تصویر


شاعر اجمل نذیر

میں ایہہ چاہواں انپڑے وطن دا نغمہ لکھاں
جس بچ ذرے ذرے دا میں عکس سجاواں
سوہنڑیاں سوہنڑیاں لفظاں نال تصویر بنڑاواں
ٹہاکے ، دریا ، ندیاں ، نالے ، صحراواں دی ریت پھلوراں
لفظاں دی میں تسبیح رولاں
ہر منظر دا عکس ٹٹولاں
میداناں دی ساوی چادر اکھیاں بچ پئی لشکاں مارے
سوہنڑے وطن دے ہر منظر دی یاد سمندراں بچ پئی تارے
پر ایہہ موسم سیتی بِچوں
ہر منظر دا رنگ بدلاندن
لفظاں اگے ڈکا لاندن
پیہڑی قسمت میری ایہہ تحریر ادھوری رہ جُلدی اے
خواہش تے تدبیر ادھوری رہ جُلدی اے
میری ہر تصویر ادھوری رہ جلدی اے
میری ہر تصویر ادھوری رہ جلدی اے

میلہ


سنڑئیے اتھے میلہ لگسی،پھیرا ٹورا پا ہی آساں
کمے کارے جوگا نہ پر سکا پکا ناں لخاساں

مانی خان فر بٹّہ چاسی، آپنڑا سارا ساہ اوہ لاسی
پہلوانی دا داء آزماسی ، گوڈے ٹیکسی ،بیٹھک لاسی
نکی جی فنکاری کرساں
دوڑ کے اس آں جپھی لاساں،سکا پکا ناں لخاساں

سنڑئیے اتھے میلہ لگسی،پھیرا ٹورا پا ہی آساں
کمے کارے جوگا نہ پر سکا پکا ناں لخاساں

گانڑے افتخار ہی گاسی،آپنڑے فن دی تہوم مچاسی
مائیے ٹپے دوہڑے گاسی، ہندکو دا اوہ رعب جماسی
نکی جی فنکاری کرساں
بیلاں سٹساں پھیری لاساں،سکا پکا ناں لخاساں

سنڑئیے اتھے میلہ لگسی،پھیرا ٹورا پا ہی آساں
کمے کارے جوگا نہ پر سکا پکا ناں لخاساں

لطیف خان فر گتکے کھیڈسی،اکھاڑہ پڑھ کے اکھیاں کڈسی
جنجو ہی اوہ دشمنڑ دے فر ،گلفے گٹے گوڈے کہڑسی
نکی جی فنکاری کرساں
دوڑ کے موہنڈے اتے چاساں،سکا پکا ناں لخاساں

سنڑئیے اتھے میلہ لگسی،پھیرا ٹورا پا ہی آساں
کمے کارے جوگا نہ پر سکا پکا ناں لخاساں

آپنڑے ناظم صاب وی آسن، آپنڑے دل دا حال سنڑاسن
نواں شہر دی ترقی والے، جنجو ہی اوہ کم گنڑاسن
نکی جی فنکاری کرساں
اٹھ کے زور دا نعرہ لاساں۔سکا پکا ناں لخاساں

سنڑئیے اتھے میلہ لگسی،پھیرا ٹورا پا ہی آساں
کمے کارے جوگا نہ پر سکا پکا ناں لخاساں
سنڑئیے فر مشاعرہ کرسن، سیتی جیسن سیتی مرسن
آپنڑے پیار دی خاطر سنگیو، جنجو ہی اوہ آہواں پہرسن
نکی جی فنکاری کرساں
واہ واہ کر کے سر ہلاساں،سکا پکا ناں لخاساں

سنڑئیے اتھے میلہ لگسی،پھیرا ٹورا پا ہی آساں
کمے کارے جوگا نہ پر سکا پکا ناں لخاساں

نواں شہر


اتھے سوہنڑیاں سب سوغاتاں نیں
نواں شہر دیاں کے باتاں نیں

ایہہ تہرتی شیر جواناں دی
ایہہ محنت کش انساناں دی
مزدوراں دی دہقاناں دی
اچے ٹہاکیاں تے میداناں دی

اتھے سوہنڑیاں سب سوغاتاں نیں
نواں شہر دیاں کے باتاں نیں

اتھے علم دے دیوے بلدے نیں
اتھے پیار دے چہکھڑ چلدے نیں
موہنڈے جوڑ کے سارے کھلدے نیں
ہر خوشی تے غم بچ رلدے نیں

اتھے سوہنڑیاں سب سوغاتاں نیں
نواں شہر دیاں کے باتاں نیں

اتھے چشمے ٹھنڈیاں پانڑیاں دے
مزے لوکاں دی آنڑیاں جانڑیاں دے
ہاسے کھیڈے نیں اتھے ہانڑیاں دے
اتھے قصے لوک کہانڑیاں دے

اتھے سوہنڑیاں سب سوغاتاں نیں
نواں شہر دیاں کے باتاں نیں

ٹہاکے کیہرا پاون باہنواں دا
اتھے مول نیھ آ کجھ چاہواں دا
ہر قوم دے پیہنڑ پہراواں دا
ٹھنڈی ٹھار چنار دی چھانواں دا

اتھے سوہنڑیاں سب سوغاتاں نیں
نواں شہر دیاں کے باتاں نیں

جڑے دوروں پاروں آندے نیں
چہولی پیار دی پہر کے جاندے نیں
جدوں دوجا پھیرا پاندے نیں
اتھے آ کے کہار بنڑاندے نیں

اتھے سوہنڑیاں سب سوغاتاں نیں
نواں شہر دیاں کے باتاں نیں

اتھے امن اے ہر اک کہار اندر
انہاں چیہڑاں ، توت ، چنار اندر
ہر مسجد تے دربار اندر
ہر موسم دی مہکار اندر

اتھے سوہنڑیاں سب سوغاتاں نیں
نواں شہر دیاں کے باتاں نیں

نواں شہر میری پہچان اجملؔ
اتھے ہر ودھیا انسان اجملؔ
اتھے خوشیاں دے سامان اجملؔ
میں اس تے واراں جان اجملؔ

اتھے سوہنڑیاں سب سوغاتاں نیں
نواں شہر دیاں کے باتاں نیں


غزل اجمل ؔ نذیر

آنڑا نیھ تے فر نہ سنگیو ، سکے لارے لایا کرو
سکیاں پکیاں قسماں چا کے دل نہ فر تڑپایا کرو

ڈرنے ولیاں ہور وی جائیان ، رنّاں کولوں ڈرنا کیہجا
مڑد او تے مڑد بنڑو ، ایویں نہ کہبرایا کرو

جرگے بچ جے جلنڑاں پیوے ، کونا مل کے بیہندے او
کجھ نہ کجھ فرمایا کرو ، حق آپنڑا جتایا کرو

سیتی بچوں پھر جلدے او تسی آپنڑیاں گلاں توں
ملنڑے دا جے ویلہ آوے ، وعدے آں نبھایا کرو

چہنگو نال اڈردے او پئے ، دولت منیا چنگی شے وے
کونڑ آخدے جے ضائع کرو ، جانی اتے لایا کرو

تسی ہک کارتوسے نال پاہنوے سو سو کہگیاں مارو
ساریاں گلاں من کہنسیں پر مٹھا تھوڑا پایا کرو

ناصرؔ وسطے برفی جامن ، اجملؔ وسطے شکر پارے
اساں سکیاں یاریں اتے ، ایویں نہ ٹرکایا کرو